《心靈雞湯》
經歷完一個血色既七月，我諗好多人都已經遍體鱗傷。不過，路還是要走下去。喺展望八月既同時，我有責任提醒大家一樣野，就係欲速則不達。
簡單既一句說話，人人都識得講。但當你輸到慌、輸到茅既時候，鋌而走險既想法就會應運而生，繼而幻想可以喺最短既時間內收復失地。如果你已經開始左有呢個想法，四圍去搵妖股，甚至學炒衍生工具既話，我請你睇埋落去：根據我既經驗，你唔單只翻唔到本，仲會連淨返果丁屎都輸埋！
無論順境又好，逆境都好，投資最緊要既就係心態同原則。炒股唔係做實驗，未掂過、無把握，或者超出自己能力範圍既野唔好掂，尤其係喺自己最茅、最慌果時！衍生工具既野，以小博大可以，瞓身就一定唔得！千祈唔好見到人地點賺點賺就以為自己可以走捷徑，人地輸過幾多又有冇同你講？
無論你認為我叻定唔叻，跟我定唔跟我，我都一樣咁關心大家。我大大話話撈呢行六年，有自己既受眾，靠嘩眾取寵黎搵食既階段已經過左。因此，我無論係响順境定逆境，大牛定大熊，都唔會導新人去做衍生。洗心革面，定啲黎，慢慢追。我今日要講既說話就係咁多，還望各位用心記取。
加油大家！
💪🏽
#唔好嫌我煩 #就當我長氣
Search